Sena ilu, nhar is-17 ta’ Lulju 2022, twaqfet din l-Organizzazzjoni, bl-isem ‘Koalizzjoni għall-Konservazzjoni tan-Naħla Maltija’. Dan evolva għal ‘Fondazzjoni għall-Konservazzjoni tan-Naħla Maltija’ nhar il-15 ta’ Marzu, 2023, bl-iffirmar tal-istatut, filwaqt fit-12 ta’ Mejju 2023, ġiet reġistrata uffiċjalment bħala Organizzazzjoni Volontarja mal-Kummissarju tal-Volontarjat!
Minn meta beda dan il-proġett, l-għan aħħari tiegħu kien, għadu u jibqa’ l-konservazzjoni b’mod olistiku tan-Naħla Maltija, li sfortunatement, bħal ħafna ħlejqiet oħrajn endemiċi għall-gżejjer Maltin, qegħdin jaffaċċjaw kriżi eżistenzjali. Ir-raġuni wara l-għażla tal-kelma ‘Koalizzjoni’ fit-titlu bikri ta’ din l-Organizzazzjoni, hi l-għan prinċipali ta’ dan il-grupp; li jservi ta’ pont li jressaq individwi, għaqdiet apikulturali u entitajiet governattivi lejn il-kooperazjoni. Is-sostenibbiltà dejjiema tas-settur apikulturali hi bbażat fuq in-naħla tal-għasel lokali, ċoe n-Naħla Maltija. Fejn hemm l-għaqda hemm is-saħħa!
Matul din is-sena ta’ ħidma, din l-Organizzazzjoni faslet, ħejjiet u ħadmet fuq diversi inizjattiva. Dan li ġej huwa sommarju tal-attivitajiet l-iktar prominenti li għamilna!
Lulju 2022 – preżenti
Fl-eqqel tal-istaġun sajfi tas-sena li għaddiet (2022), bdejna kampanja rigward l-isfida tal-Bagħal taż-żunżan (Oriental hornet). Fosthom:
· Ħejjejna artiklu informattiv fuq il-Bagħal taż-żunżan, u fatti oħra relatati li jolqtu n-Naħla Maltija.
· Bgħattna ittra uffiċjali lill-Awtoritajiet lokali rigward il-problema li ħoloq il-Bagħal taż-żunżan lit-trobbija tan-naħal lokalment. L-injoranza rigward din il-problema, ma setgħetx tkun iktar skuża!
· Varajna petizzjoni sabiex jinġabar l-appoġġ tal-pubbliku fuq il-problema tal-Bagħal taż-żunżan. Din ġiet preżentata lill-Awtorita tal-Ambjent (ERA) f’Ottubru.
Ottubru 2022
L-iktar artiklu li għamel ħoss fuq il-mezzi soċjali tagħna kien jitratta kampjuni tal-Bagħal taż-żunżan li għandhom madwar 70 sena. Dan jindika b’mod ċar li din l-ispeċi hi indiġena għal pajjiżna, u ż-żieda qawwija fil-popolazzjoni tiegħu ġiet ikkawżata minħabba l-attività tal-bniedem.
Diċembru 2022
Flimkien ma’ The ‘GROW 10 TREES’ Project (G10T), nidejna inizjattiva msemmija ‘Pollinates – Flora Maltija għad-Dakkara’ sabiex nippromwovu flora li b’mod speċjali hija importanti għal insetti dakkara li nsibu fil-Gżejjer Maltin, inkluż in-Naħla Maltija!
Marzu 2023
Nidejna kampanja informali biex jiġi evitat qtugħ ta’ ħaxix selvaġġ f’toroq u passaġġi rurali, għall-benefiċċju tad-dakkara li nsibu fil-gżejjer Maltin, inkluż in-Naħla Maltija.
April 2023 – preżenti
F’dan ix-xahar bdejna kampanja ewlenija sabiex in-Naħla Maltija tiġi ddikjarata bħala l-Insett Nazzjonali. Fosthom:
· Flimkien mas-Sur David Chetcuti Dimech u Prof Simone Borg, lettur fil-Fakulta tal-Liġi fl-Università ta’ Malta, ippubblikajna f’ġurnal internazzjonali studju legali li jitratta ‘Il-Protezzjoni tan-Naħla tal-Għasel Endemika Maltija’. L-istudju jitratta diversi modi kif in-Naħla Maltija tista’ tiġi protetta b’mod olistiku billi jiġu applikati liġijiet kurrenti Maltin, Ewropej u Internazzjonali.
· Nhar l-20 ta’ Mejju 2023, fil-Jum Dinji tan-Naħal għamilna talba uffiċjali lill-Awtorità għall-Ambjent u r-Riżorsi sabiex in-Naħla Maltija tiġi ddikjarat bħala l-Insett Nazzjonali.
· Aktar tard, komplejna l-kampanja tagħna bi ġbir t’appoġġ mingħand il-Kunsilli Lokali u Reġjonali.
Mejju 2023
Dan ix-xahar kien l-iktar wieħed attiv għall-Organizzazzjoni.
· L-organizzjazzjoni ġiet irreġistrata b’mod uffiċjali, u segwentament varajna emblema ġdida sabiex naġġornaw ruħna u tissaħħah l-identità tal-Fondazzjoni.
· Matul dan iż-żmien ukoll, ġejna wkoll mistiedna u attendejna għal żewġ intervisti televiżi (Vuċi għall-Annimali u Niskata), sabiex inkomplu inwasslu l-messaġġ tagħna!
Ġunju 2023
Nidejna inizjattiva li permezz tagħha ser nibnu database ta’ naħħala li jrabbu n-naħal f’Malta sabiex isservi bħala qafas għal proġetti jew azzjonijiet futuri. L-iskop aħħari hu li jkun hemm koordinament bejn il-partijiet interessati fin-Naħla Maltija
Matul dan is-sena ta’ ħidma, ippublikajna artiklu fuq it-Times of Malta rigward l-impatt tat-tibdil fil-klima fuq in-Naħla Maltija u l-apikultura lokali. Ippublikajna wkoll artiklu ieħor fuq il-Malta Independent rigward rapport maħrug fl-1995 fuq is-sitwazzjoni apkiulturali ta’ dak iż-żmien, u l-ħtieġa t’azzjoni issa. Matul dawn ix-xhur bgħattna wkoll il-kummenti tagħna fuq diversi strateġiji ambjentali li kienu miftuħa għal konsultazzjoni:
· L-Istrateġija Nazzjonali għall-Ambjent 2050 (Ottubru 2022)
· L-Istrateġija ta’ Malta għall-Iżvilupp Sostenibbli għall-2050 (Jannar 2023)
· L-Istrateġija Nazzjonali u l-Pjan t’Azzjoni ta’ Malta għad-Dakkara sal-2035 (Marzu 2023)
· L-Istrateġija Nazzjonali Tal-Bijodiversita u Pjan ta’ Azzjoni sal-2030 (Marzu 2023)
Il-Fondazzjoni għandha diversi inizjatttivi għaddejin, u proġetti ġejjiena sabiex inkomplu insaħħu l-ħidma tagħna b’riżq in-Naħla Maltija, u l-ġid komuni.
Kompli għina billi ssegwina fuq il-mezzi kollha tal-Organizzazzjoni! Grazzi mill-qalb tal-appoġġ tagħkom!
Leave a comment