Bi pjaċir inħabbru li llum, 15 ta’ Marzu, 2023, din l-organizzazzjoni ġiet kostitwita bħala ‘Fondazzjoni’ bl-iffirmar tal-istatut. Dan it-tragward qed jiġi rifless ukoll fil-bidla fl-isem għal ‘Fondazzjoni għall-Konservazzjoni tan-Naħla Maltija’.
Minnufih bdejna l-proċess sabiex nirreġistraw ruħna mal-Uffiċju tal-Kummissarju għall-Organizzazzjonijiet Volontarji.
Nixtiequ minn qalbna nirringrazzjaw lin-nutar Dr. Dejan Debono li b’tant dedikazzjoni għena tul il-proċess kollu!
Il-fondazzjoni ser tkompli taħdem fuq dawn l-objettivi:
➼ Tgħarraf bl-importanza tan-Naħla Maltija għall-ambjent naturali ta’ pajjiżna (ekoloġija) u għas-settur tal-apikultura u f’iktar sens wiesgħa dak agrikolu.
➼ Tgħarraf li n-Naħla Maltija tagħmel parti mill-patrimonju naturali Malti u għalhekk jistħoqqilha li tiġi kkonservata b’mod olistiku.
➼ Tinkoraġġixxi l-għarfien, it-trobbija u r-riċerka fuq in-naħla endemika Maltija.
➼ Tiġbor taħt umbrella waħda u tikkordina entitajiet varji, individwi u organizzazzjonijiet mhux governattivi li għandhom interess fil-konservazzjoni tan-Naħla Maltija.
➼ Tagħmel pressjoni biex jiġi mfassal pjan sabiex in-Naħla Maltija tkun protetta b’mod olistiku.
Għandna diversi proġetti pjanati għaż-żmien li ġej. B’entużjażmu inħarsu ‘il quddiem sabiex flimkien magħkom is-segwaċi, nimplimentawhom b’suċċess, b’riżq in-Naħla Maltija, u l-ġid komuni.
Leave a comment